接  好  班

（小 粤 剧）

                                                                                             人物：伯爷公、伯爷婆、苏仔（爷、嬷、孙关系）

（到春来一句起幕，伯爷婆煮熟饭菜，小锣相思上场，出门遥望未见人回返屋。

伯爷婆：（夜上海）爷未回、孙未回，菜都摆冷要把炉回；我成世累，天天累，佢俩爷孙都几登对，一个老来寻乐趣，苏仔放学到如今也未回。

        （白）伯爷公成日闹个孙唔用心学习，话佢又参加少儿粤剧训练班啦，少年书法班，呢样班，个样班，其实我觉得个孙学习成绩过得去，培养佢多方面兴趣，亦系一件好事。伯爷公成日话个孙玩到食饭都未返，今日佢自己又唔系过咗时间都未返，识得话人唔识话自己呀！我都重新煮热饭菜先。（下）

伯爷公：（撞点上古腔中板）

        老来寻欢玩下牌；麻雀扑克使我乐开怀。今日时光过得真系快，回家叫伯爷婆（进门介，伯爷婆上白：来啦）快将饭菜开上来。

伯爷婆：（白）你都知道肚饿咩？一返来就顾住叫开饭，个孙都仲未返呀！

伯爷公：（白）已经放学咁耐啦，玩到如今，仲未返。一阵佢返来等佢食饱餐黄鳝炒面，打到佢二跳四。

伯爷婆：（白）伯爷公，（秃头二王）你只知佢放学归迟，你怎知、何解。成日喊打喊杀，唔通打得个孙乖。

伯爷公：（接唱二王）你种嘅大头菜都生骨，正式将孙种坏。不专心学习，长大变作废柴。

伯爷婆：（唱序）你先至系废柴。

伯爷公：（白）吓！你话我老咗变废柴？（气妲已）唉呀呀，今日我就老虎发威，打到佢无订匿埋。（冲入场取藤条复上介）

伯爷婆：（三拦夺藤条，沉花）哎呀呀，你唔知轻重，苏仔佢点挨。（白）你要打就先打我啦！

伯爷公：（白）你……

伯爷婆：（白）打啦！要打就打我啦！

伯爷公：（白）咳！（两人堵气背坐科泛介）

苏  仔：（内白）来了！（古装穿京装背插刀马鞭走边上介，英雄白）少年粤剧班，彩排雁门关，获得人人皆称赞，更添豪气，把家还。

伯爷婆：（白）苏仔返来啦！（出门介）

苏  仔：（见嬷出门，丢马鞭拔刀杀上白）阿嬷看刀。（上下撒挣嬷落苏刀介）

伯爷婆：（白）苏仔，阿嬷后生时食过夜粥架！

苏  仔：（白）阿嬷，你揾时间教返我两度！

伯爷婆：（白）好好好，等你完成功课，阿嬷又得闹，叫埋你爷教返你两度。

伯爷公：（仙花调）你你你未免不识好歹，苏仔比你种到娇晒，天已将黑，功课仍未做埋，一于贪玩学人做戏班，不读书就无文化，大个点办？

苏  仔：（白）阿爷呀！

伯爷公：（白）返入嚟先讲！（入屋介）

苏  仔：（白）阿爷呀！（白榄）老师话广东要实现文化大省，教育改革培养好学生，全面发展素质教育，我中意学粤剧，仲要打大翻，你同阿嬷都要教我，我地一家一代一代接好班接好班。

伯爷婆：（减字芙蓉）苏仔好听话，读书学习无得弹。现在已天黑，要快的食晚饭。

苏  仔：（白）唔食，我要阿爷应承教我做戏先食。

伯爷公：（白）你要我教你做戏，就先检查你嘅学习，攞啲作业本成绩单嚟。

        （检查作业介，念成绩单：语文92，算术98，英语90）

苏  仔：（白）阿爷，苏仔读书威唔威呀？

伯爷公：（摇头晃脑白）仲可以！

伯爷婆：（滚花）咁你以后唔好开口就话打到佢残。

伯爷公：（白）佢以后如果唔好好读书，我一样要打，所谓打者爱也，爱者打多三几下嘛！

苏  仔：（白）咁你两个教唔教我做戏呀？

伯爷婆：（滚花）咁就收你为徒学做戏，但系要不怕辛苦不能偷懒。

  合  ：（接）将传统艺术发扬光大，勤学苦练接好班！

苏  仔：（白）拜见师傅。

伯爷婆：哈哈哈！

       （扎架）